ស្រវឹងស្រាជិះម៉ូតូចុះពីលើស្ពានអាកាស៧មករា

រាជធានីភ្នំពេញ ៖ បុរសម្នាក់ស្រវឹងស្រាជិះម៉ូតូអាយខនចុះពីលើស្ពានអាកាស៧មករាលឿនពេក ជ្រុលទៅទាក់ដៃចង្កូតម៉ូតូ នឹងរនាំងដែកចែកផ្លូវ បណ្តាលឱ្យដួលម៉ូតូអូសជាង២០ម៉ែត្រ ចំណែកអ្នកបើកម៉ូតូធ្លាក់នៅគល់ស្ពានខាងកើតរងរបួសធ្ងន់ ។ ហេតុការណ៍នេះ កើតឡើងកាលពីវេលាម៉ោង១០ និង៣០នាទីយប់ថ្ងៃទី៦ កុម្ភៈ តាមបណ្តោយមហាវិថីសហព័ន្ធរុស្ស៊ី ក្នុងសង្កាត់ទឹកល្អក់ទី១ ខណ្ឌទួលគោក ។ សាក្សីឃើញហេតុការណ៍បានឱ្យដឹងថា មុនពេលកើតហេតុបុរសរងគ្រោះជិះម៉ូតូអាយខនពណ៌លឿងលាយស ចុះពីលើស្ពានអាកាស៧មករា ពីលិចទៅកើត ក្នុងល្បឿនលឿន ខណៈពេលចុះដល់គល់ស្ពានខាងកើត ស្រាប់តែរេចង្កូតម៉ូតូទាក់ជាមួយរនាំងដែកពុះចែកផ្លូវ បណ្តាលឱ្យដួលម៉ូតូួអូសជាង២០ម៉ែត្រ រីឯអ្នកជិះម៉ូតូធ្លាក់នៅគល់ស្ពានរងរបួសធ្ងន់ ។ក្រោយពេលកើតហេតុ ជនរងគ្រោះត្រូវរថយន្តសង្គ្រោះមន្ទីរពេទ្យព្រះកុសុមៈដឹកយកទៅ ព្យាបាល ចំណែកម៉ូតូត្រូវបានសមត្ថកិច្ចយកទៅរក្សាទុកនៅប៉ុស្តិ៍រដ្ឋបាល ទឹកល្អក់ទី១ ៕