រាជធានីភ្នំពេញ ៖ រថយន្តតូយ៉ូតាព្រូស
ពណ៌ប្រផេះ ពាក់ស្លាកលេខភ្នំពេញ ២T -៩០៤៣ បើកបរ
និងរួមដំណើរដោយជនជាតិចិនជាច្រើននាក់មានស្រីមានប្រុស
សុទ្ធតែស្រវឹងជ្រុលបុកខឿនសួនច្បារស្ថានីយប្រេងឥន្ធនៈមួយ
កន្លែងបណ្ដាលឱ្យអ្នកជិះក្នុងរថយន្ត
ទង្គិចក្បាលគ្នាតែមិនមានរងរបួសធ្ងន់ធ្ងរទេ ។
ហេតុការណ៍នេះធ្វើឱ្យកកស្ទុះចរាចរណ៍
ដោយសារតែកើតឡើងទាំងថ្ងៃមានមនុស្សចោមរោមមើលនៅតាម
មហាវិថីព្រះមុនីវង្ស ក្នុងសង្កាត់បឹងកេងកងទី៣ ខណ្ឌចំការមន
កាលពីវេលាម៉ោង១ និង៤០នាទីរសៀលថ្ងៃទី១៩ ឧសភា ។
សាក្សីនិយាយថា មុនពេលកើតហេតុរថយន្តព្រូស
និងម៉ូតូមួយគ្រឿងមិនចាំម៉ាកធ្វើដំណើរស្របទិសគ្នា
ហើយម៉ូតូបត់ស្ដាំចូលចាក់សាំង ធ្វើឱ្យរថយន្តបើកលឿន
ព្យាយាមគេចក៏ជ្រុលទៅបុកខឿនសួនច្បារស្ថានីយប្រេង
ឥន្ធនៈកល់ទ្រូងទៅលែងរួច
បណ្ដាលឱ្យអ្នកជិះក្នុងរថយន្តទង្គិចក្បាលគ្នាតែមិនមាន
រងរបួសធ្ងន់ធ្ងរទេ ឯរថយន្តខូចផ្នែកខាងមុខទាំងស្រុង ។
ពេលកើតហេតុអ្នកដំណើរ
និងបុគ្គលិកស្ថានីយប្រេងឥន្ធនៈភ័យបុកពោះគ្រប់គ្នា
ខណៈរថយន្តបើកលឿនស្លេវសំដៅចូលស្ថានីយ
ហើយបើជ្រុលទៅបុកធុងស្ដុកសាំងប្រាកដជាបណ្ដាលឱ្យ
ផ្ទុះបង្កជាអណ្ដាតភ្លើងសន្ធោសន្ធៅជាមិនខាន ។
ហេតុការណ៍នេះតំណាងក្រុមហ៊ុនស្ថានីយ
ប្រេងឥន្ធនៈទាមទារសំណង៧០០ដុល្លារ ព្រោះខូចខាតខឿនសួនច្បារ
ដងទង់ជាតិ២បង្គោល ។ រយៈពេលជាងមួយម៉ោង
ទើបខាងជនជាតិចិនទាំងនេះយល់ព្រម
ព្រោះខ្លាចនគរបាលវាស់ជាតិអាល់កុល ៕
ប្រភពមកពី៖ កោះសន្តិភាព