កម្មករលើសែងលោតសម្លាប់ខ្លួនត្រូវជួយទាន់

 
ភ្នំពេញ ៖ កម្មករលីសែងម្នាក់ មិនដឹងជា មានរឿងអ្វីកើតឡើង បានសម្រេចចិត្ដលោត ទឹកពីលើស្ពានព្រះមុនីវង្សថ្មី កាលពីវេលា ម៉ោង១១ព្រឹកថ្ងៃទី៥ ខែមិថុនា ឆ្នាំ២០១៣ ប៉ុន្ដែនៅពេលដែលលោតចូលទៅក្នុងទឹក ហើយនោះ ប្រហែលជាមិនចង់ស្លាប់ក៏ហែល មកច្រាំងទន្លេ រួចហើយលិចចូលក្នុងទឹកត្រូវ អ្នកស្ទូចត្រីនៅក្រោមស្ពាន ឃើញទាន់បាន ទៅជួយយកមកលើគោក រួចផុតពីសេចក្ដី ស្លាប់ ។
យោងតាមប្រភពព័ត៌មានពីសាក្សីនៅ កន្លែងកើតហេតុបានឱ្យដឹងថា ជនរងគ្រោះ រូបនេះ មានឈ្មោះកាន់ សុភាព ហៅគោ អាយុ៣២ឆ្នាំ រស់នៅភូមិព្រែកតានូ សង្កាត់ ចាក់អង្រែក្រោម ខណ្ឌមានជ័យ ។
សាក្សីនៅកន្លែងកើតហេតុបានឱ្យដឹងថា ជនរងគ្រោះរូបនេះ បានលោតសម្លាប់ខ្លួនពី លើស្ពានព្រះមុនីវង្សថ្មី ដោយមិនទាន់ដឹងពី មូលហេតុពិតប្រាកដនៅឡើយទេ ប៉ុន្ដែជន នេះ ត្រូវបានសមត្ថកិច្ចអះអាងថា ជាមនុស្ស ស្រវឹងខួប ។
បើតាមសាក្សី មុនពេលកើតហេតុជនរង គ្រោះ បានលោតចូលទៅក្នុងទឹកចំពាក់ កណ្ដាលស្ពាន ហើយពេលធ្លាក់ចូលទៅក្នុង ទឹកនោះ បានហែលប្រវេប្រវ៉ាឡើងគោក មកវិញ  លុះពេលហែលជិតដល់មាត់ច្រាំង ក៏លិចចូលទៅក្នុងទឹក ប៉ុន្ដែត្រូវបានអ្នកស្ទូច ត្រីនៅក្រោមស្ពានឃើញទាន់ រួចហើយទៅ ជួយស្រង់ទៅលើគោកវិញ រួចពីសេចក្ដីស្លាប់។
ប្រភពមកពី៖ដើមអម្ពិល